ក្បួនហោរាទាយសម្រាប់ឆ្នាំ ២០១៤ *ឆ្នាំជូត រាសីល្អមធ្យម - ការរកស៊ី : ការរុលទៅមុខនៃការរកស៊ីនៅតែជួបឧបសគ្គខ្លះៗដដែល ព្រោះជារឿយៗរមែងតែងមានបញ្ហា ចោទឡើងឥតឈប់ឈរ ។ ដូច្នេះបើមិនខិតខំប្រឹងប្រែងទេនោះគឺប្រាក់ចំណេញដែលបម្រុងធ្លាក់ដល់ដៃហើយបែរ ជាបោលហួសធ្លាក់ចូលក្នុងដៃអ្នកដទៃវិញ ។ - ជោគទ្រព្យ : ផលកម្រៃហូរចូលជាហូរហែរ ។ តែត្រូវចេះទូទាត់បញ្ជីចំណូល និង ចំណាយឱ្យបានត្រឹមត្រូវ ។ - សុខភាព : មានសុខភាពល្អជា ។ តែត្រូវយកចិត្តទុកដាក់ក្នុងការថែទាំសុខភាពរបស់ចាស់ទុំនៅក្នុងគ្រួសារឱ្យ បានល្អ ។ - ស្នេហា : ចំពោះគូស្នេហ៍ទាល់តែចេះអត់ឱនឱ្យគ្នាទៅវិញទៅមក ទើបចំណងស្នេហាអាចឋិតឋេរគង់វង្សបានយូរអង្វែង ។ * ឆ្នាំឆ្លូវ រាសីស្រុតចុះ - ការរកស៊ី : ការរកស៊ីជួបរឿងរកាំរកូសច្រើន ជាពិសេសត្រូវប្រឈមមុខនឹងគូប្រជែងជើងខ្លាំងចេញមកតតាំង ។ ដូច្នេះត្រូវត្រៀមលក្ខណៈទុកសម្រាប់ទប់ទល់ជាមុន ទើបមិនជួបការបរាជ័យ ។ - ជោគទ្រព្យ : ក្រៅពីត្រូវយកចិត្តទុកដាក់ក្នុងការគ្រប់គ្រងទ្រព្យឱ្យបានគង់វង្សគឺពុំត្រូវប្រព្រឹត្តល្បែងស៊ីសងឡើយ ។ ប្រយ័ត្នអាចរលាយទ្រព្យឆាប់ ។ - សុខភាព : ប្រយ័ត្នអាចជួបគ្រោះហូរឈាមដោយមុតកាំបិទពូថៅ ឬ ឧបករណ៍មុខស្រួច ។ - ស្នេហា : ចំពោះគូស្វាមីភរិយាច្រើនមានរឿងរកាំរកូសកើតឡើងដោយពុំដឹងពីមូលហេតុ ។ ដូច្នេះត្រូវចេះអត់ធ្មត់ទាំងសងខាងទើបមានសេចក្តីសុខនៅក្នុងគ្រួសារ ។ * ឆ្នាំខាល រាសីឡើងខ្ពស់ត្រដែត - ការរកស៊ី : ដោយសារតែរាល់ឧបសគ្គត្រូវបានសាបរលាបបាត់ស្រមោលអស់រលីង ។ រីឯរឿងរកាំរកូសដែល ធ្លាប់មានពីពេលមុនៗមកក៏ត្រូវស្ងប់ស្ងាត់ទៅវិញដែរ ។ ដូច្នេះជាឱកាសល្អក្នុងការពង្រីកមុខរបររកស៊ីជួញដូរតាមបំណងប្រាថ្នា ។ - ជោគទ្រព្យ : ផលកម្រៃហូរចូលច្រើនពីគ្រប់ទិសទី ។ តែត្រូវចេះចាយវាយដោយសន្សំសំចៃបន្តិច ទើបពុំមាន វិបត្តសេដ្ឋកិច្ចគ្រួសារនៅថ្ងៃមុខ ។ - សុខភាព : មានសុខភាពល្អជា ។ តែនៅពេលយប់ត្រូវយកចិត្តទុកដាក់ចំពោះសុវត្ថិភាពនៃការធ្វើចរាចរ ។ - ស្នេហា : ចំណងស្នេហារវាងស្វាមីភរិយាមានភាពល្អូកល្អិនល្អណាស់ ។ * ឆ្នាំថោះ រាសីល្អមធ្យម - ការរកស៊ី : ថ្វីដ្បិតតែការរកស៊ីនៅជួបនឹងឧបសគ្គខ្លះៗក្តី ។ តែមិនភ័យព្រួយអ្វីឡើយ ព្រោះអាចរកដំណោះស្រាយបានជ្រះស្រឡះ ។ ក្រៅពីនោះមិនត្រូវហ៊ានប្រថុយប្រថានក្នុងការបណ្តាក់ទុនរកស៊ីដោយទ្រង់ទ្រាយធំឡើយ ។ -ជោគទ្រព្យ : នៅដើមខែផលកម្រៃហូរចូលខ្សត់ខ្សោយ ។ តែនៅចុងខែមានផលកម្រៃហូរចូលច្រើនយ៉ាងគាប់ចិត្ត ។ - សុខភាព : សុខភាពពិតមែនតែពុំសូវចោទជាបញ្ហាធ្ងន់ធ្ងរក្តី ។ តែអ្វីដែលត្រូវយកចិត្តទុកដាក់នោះគឺអនាម័យ នៃការហូបចុក ។ - ស្នេហា : ចំណងស្នេហារវាងគូស្នេហ៍ប្រែមកជាល្អប្រសើរឡើងវិញដែលមិនខុសពីរកអុសប៉ះឈើងាប់នោះឡើយ ​គឺអាចសាងពន្លកស្នេហាសាជាថ្មី ។ * ឆ្នាំរោង រាសីល្អមធ្យម ។ - ការរកស៊ី : ការវិវឌ្ឍនៃការរកស៊ីជារឿយៗរមែងតែងបានជួបនូវបញ្ហាឥតឈប់ឈរ ។ ដូច្នេះត្រូវយកចិត្តទុកដាក់ក្នុងការ ទប់ទល់ដើម្បីចៀសវាងកុំឱ្យគូប្រជែងឆ្លៀតឱកាសវាយបកបាន ។ ក្រៅពីនោះត្រូវចេះរក្សាការសម្ងាត់ក្នុងការរកស៊ី ។ - ជោគទ្រព្យ : ផលកម្រៃដែលរកតាមកម្លាំងញ្ញើសឈាមគឺហូរចូលជាធម្មតា ។ តែចំពោះទ្រព្យក្តៅក្រហាយ ពុំត្រូវលូកដៃទទួលយកឡើយ ។ ប្រយ័ត្នអាចនាំអំពល់ទុក្ខដាក់ខ្លួន ។ - សុខភាព : សុខភាពល្អជាធម្មតា ។ តែនៅពេលយប់ហាមបង្ករឿងឈ្លោះប្រកែកជាមួយនឹងអ្នកដទៃ ។ ប្រយ័ត្នអាចជួបគ្រោះបង្ហូរឈាម ។ - ស្នេហា : ជោគស្នេហាមិនសូវល្អជាទេ ។ ហាមលួចស្នេហ៍លួចកើតទុកតែម្នាក់ឯង ឬ ប្រើគ្រឿងស្រវឹង ដើម្បីបំបាត់ទុក្ខព្រួយនោះឡើយ ។ *ឆ្នាំម្សាញ់ រាសីឡើងខ្ពស់ - ការរកស៊ី : អាចប្រកបមុខរបររកស៊ីជួញដូរបានពេញដៃពេញជើង ព្រោះរាល់ចង្រៃឧបទ្រព្យ និង រាល់ឧបសគ្គត្រូវបាន សាបរលាបបាត់ស្រមោលអស់រលីង ។ តែដាច់ខាតកុំមានចិត្តលោភលន់ដោយចង់មានចង់បានឱ្យហួសប្រមាណពេកទេ ។ ប្រយ័ត្នអាចបង់ខាតលាភសក្ការៈវិញ ។ - ជោគទ្រព្យ : ផលកម្រៃហូរចូលច្រើនហូរហៀ ។ តែនៅចុងខែត្រូវបន្ធូរដៃក្នុងការចាយវាយដែលពុំចាំបាច់ ។ - សុខភាព : មានសុខភាពល្អជា ។ តែត្រូវចេះគ្រប់គ្រងទម្លាប់នៃការហូបចុក ដើម្បីចៀសវាងកុំឱ្យប៉ះពាល់ដល់ សុខភាពក្រពះ និង ពោះវៀន ។ - ស្នេហា : ចំពោះកំលោះ-ក្រមុំអាចជួបនឹងមនុស្សផ្ទុយភេទម្នាក់យ៉ាងគាប់ចិត្ត ។ ដូច្នេះត្រូវចេះបណ្តុះបណ្តាលចំណងស្នេហាឱ្យបានល្អ ។ * ឆ្នាំមមី រាសីស្រុតចុះ ។ - ការរកស៊ី : ការរកស៊ីជួបនឹងបញ្ហាមួយហើយមួយទៀតឥតចេះចប់ ។ ដូច្នេះប្រសិនបើចាត់ចែងដោយធ្វេស ប្រហែសតែបន្តិច ប្រហែលជាអាចខំប្រឹងប្រែងដោយឥតប្រយោជន៍ ។ - ជោគទ្រព្យ : ផលកម្រៃហូរចូលតិច និង អណ្តែតមានការប្រែប្រួលពុំទៀងទាត់ឡើយ ។ ដូច្នេះកុំហ៊ានប្រថុយប្រថាន ក្នុងការបណ្តាក់ទុនរកស៊ីដោយទ្រង់ទ្រាយធំឡើយ ។ - សុខភាព : មានអារម្មណ៍តានតឹងនឹងមានចិត្តគំនិតវិលវល់ ។ ដូច្នេះត្រូវឆ្លៀតពេលសម្រាកឱ្យបានច្រើន ។ ប្រយ័ត្នកុំធ្វើការឱ្យហួសកម្លាំងអាចធ្លាក់ខ្លួនឈឺ ។ - ស្នេហា : ចំពោះគូស្នេហ៍ ឬ គូស្វាមីភរិយាត្រូវចេះអាស្រ័យឱ្យគ្នាទៅវិញទៅមក ដើម្បីចៀសវាងការភាន់ច្រឡំអាចបង្ក រឿងឈ្លោះប្រកែកគ្នា ។ * ឆ្នាំមមែ រាសីឡើងខ្ពស់ត្រដែត - ការរកស៊ី : ការវិវឌ្ឍនៃការរកស៊ីគឺមានល្បឿនលឿនទៅមុខដូចអុំទូកបណ្តោយខ្សែទឹកហូរ ។ ដូច្នេះបើសម្លឹងចំគោលដៅ ហើយគឺត្រូវញាប់ជើងញាប់ដៃវៃសម្រុកទាន់ឱកាសល្អមកដល់ ។ - ជោគទ្រព្យ : មានផលកម្រៃហូរចូលច្រើនមកពីគ្រប់ទិសទី ។ តែនៅចុងខែប្រយ័ត្នអាចជួបគ្រោះចាញ់បោកគេ បង់ខាតទ្រព្យឥតអំពើ ។ - សុខភាព : មានសុខភាពល្អជា ។ តែប្រយ័ត្នចំពោះគ្រឿងស្រវឹងទទួលទានច្រើនជ្រុលអាចបំផ្លាញសុខភាព ។ - ស្នេហា : ចំពោះកំលោះ-ក្រមុំអាចទាក់ទងចងសម្ពន្ធមេត្រី និង អាចសាងពន្លកស្នេហា ព្រោះមានការចុះសម្រុងនឹងគ្នា ។ * ឆ្នាំវក រាសីស្រុតចុះ - ការរកស៊ី : មុខជំនួញជួញដូរជួបរឿងរកាំរកូសច្រើន ។ ដូច្នេះទាល់តែចេះខាំមាត់សង្កត់ចិត្ត និង ខិតខំប្រឹងតស៊ូព្យាយាមបន្តិច ទើបមិនធ្លាក់ដុនដាបខ្លាំង។ ក្រៅពីនោះមិនត្រូវចេញទៅរកស៊ីផ្លូវឆ្ងាយឡើយ ។ - ជោគទ្រព្យ : ផលកម្រៃហូរចូលបានតិចតួចស្តួចស្តើង និង រកបានមកដោយកម្លាំងញើសឈាម ។ ដូច្នេះកុំរកបានមក​ដោយតឹងតែចាយធូរឱ្យសោះ ។ - សុខភាព : សុខភាពមិនមានបញ្ហាចោទធ្ងន់ធ្ងរទេ ។ តែនៅដើមពាក់កណ្តាលខែតោងប្រយ័ត្នប្រយែងក្រែងជួបគ្រោះមុខកាំបិត ពូថៅ ឬ ឧបរកណ៍មុខស្រួចផ្សេងៗ ។ - ស្នេហា : ចំពោះគូស្នេហ៍ការវិវឌ្ឍនៃចំណងស្នេហាប្រៀបដូចជាអុំទូកបញ្ច្រាសខ្សែទឹកហូរគឺងាយធាក់ថយ ​ក្រោយពិបាករុករុល ។ * ឆ្នាំរកា រាសីស្រុតចុះ - ការរកស៊ី : ទោះជាបានប្រកបមុខរបររកស៊ីជួញដូរអ្វីក៏ដោយគឺត្រូវធ្វើដោយសន្សឹមៗកុំបំបោល ។ ដាច់ខាតមិន​ត្រូវរកស៊ីអ្វីទាំងងងឹតងងល់ខ្វះការត្រិះរិះពិចារណា ។ ប្រយ័ត្នអាចធ្លាក់ចូលក្នុងល្បិចកលរបស់គូប្រជែង ។ - ជោគទ្រព្យ : ផលកម្រៃដែលរកបានមកហើយត្រូវចេះគ្រប់គ្រងឱ្យបានគង់វង្ស ។ ប្រយ័ត្នអាចជួបគ្រោះចោរលួចឆក់ប្លន់ ។ - សុខភាព : សុខភាពល្អជាធម្មតា ។ តែនៅពាក់កណ្តាលខែត្រូវយកចិត្តទុកដាក់ឱ្យមែនទែនចំពោះសុវត្ថិភាពនៃការធ្វើចរាចរ ព្រោះគ្រោះថ្នាក់មានគ្រប់វិនាទី ។ - ស្នេហា : ចំណងស្នេហារវាងគូស្នេហ៍ និង គូស្វាមីភរិយាមានគេនាំរឿងក្តៅក្រហាយមកអុជអាល ។ ដូច្នេះត្រូវចេះធ្វើគ ធ្វើថ្លង់ ធ្វើខ្វាក់មួយគ្រាសិនទើបបានសុខកាយសប្បាយចិត្ត ។ * ឆ្នាំច រាសីឡើងខ្ពស់ត្រដែត ។ - ការរកស៊ី : មុខរបររកស៊ីជួញដូរបានកាក់កបល្អណាស់ ព្រោះមានទំនិញលក់ចេញទិញចូលឥតទំនេរដៃ ហើយបើទោះជា​មានអតិថិជនខ្វះបំណុលខ្លះៗក្តីក៏មិនភ័យព្រួយដែរ គ្រាន់តែការទូទាំងសងវិញយូរ ឬ ឆាប់ប៉ុណ្ណោះ ។ - ជោគទ្រព្យ : មានផលកម្រៃហូរចូលមកពីគ្រប់ទិសទី ។ រីឯការបង្វិលទុនរកស៊ីក៏ដំណើរការបានស្រួលដែរ ។ នៅពាក់កណ្តាលខែអាចមានទ្រព្យហូរចូលមួយចំនួនធំដោយចៃដន្យទៀតផង ។ - សុខភាព : មានសុខភាពល្អប្រសើរ ។ តែត្រូវយកចិត្តទុកដាក់ចំពោះជំងឺតូចតាចខ្លះៗ ព្រោះហ៊ានតែបណ្តែតបណ្តោយ​អាចក្លាយពីជំងឺស្រាលទៅធ្ងន់ធ្ងរ។ - ស្នេហា : ចំណងស្នេហារវាងគូស្នេហ៍មានការរីកលូតលាស់ទៅមុខអាចឈានទៅដល់ការរៀបអាពាហ៍ពិពាហ៍ បានដោយ​គ្មានឧបសគ្គអ្វីមករាំងស្កាត់ទៀតផង ។ * ឆ្នាំកុរ រាសីឡើងខ្ពស់ត្រដែត ។ - ការរកស៊ី : មុខរបររកស៊ីអាចដំណើរការបានស្រួល ហើយបើទោះជាបានជួបគូប្រជែងជើងខ្លាំងចេញមកតតាំងយ៉ាងណាក្តី​ក៏មិនភ័យព្រួយដែរ​ ព្រោះអាចយកប្រៀបឈ្នះជាប់ជានិច្ច ។ - ជោគទ្រព្យ : មានផលកម្រៃហូរចូលយ៉ាងច្រើនសន្ធឹកសន្ធាប់ ។ តែចំពោះទ្រព្យក្តៅក្រហាយចូរកុំមានចិត្តលោភលន់ឱ្យសោះ ។ ប្រយ័ត្នបែរជាកើតរឿងរ៉ាវអាចបង់ខាតលាភសក្ការៈវិញ ។ - សុខភាព : មានសុខភាពជាធម្មតា ។ តែលៃលកយ៉ាងណាចូរកុំងប់ងល់គ្រឿងស្រវឹងខ្លាំងពេក ព្រោះអាចបំផ្លាញសុខភាព ។ - ស្នេហា : ចំណងស្នេហារវាងគូស្នេហ៍ និង គូស្វាមីភរិយាមានភាពល្អូកល្អិនណាស់ ៕

ប្រាសាទខ្មែរ ដកយកចម្រៀងខ្មែរ ស្រុកខ្មែរ ព្រះមហាក្សត្រខ្មែរ អ្នកចម្រៀងខ្មែរ ព័ត៌មានវិទ្យា គណិតវិទ្យា ធរណីមាត្រ រូបវិទ្យា ជីវវិទ្យា សាស្តនាសកល ប្រព័ន្ធព្រះអាទិត្យ ស្តាប់ វិទ្យុខ្មែរ ទស្សនា ទូទស្សន៍ខ្មែរ